#

 

 

 

Rhif y ddeiseb: P-05-826 Teitl y ddeiseb: Mae Sir Benfro yn dweud NA !! i gau adran damweiniau ac achosion brys Llwynhelyg Testun y ddeiseb: Rydym ni sydd wedi llofnodi isod yn galw ar Lywodraeth Cymru a Bwrdd Iechyd Hywel Dda i wrthdroi eu penderfyniad i israddio ein hysbyty sirol a chael gwared ar ein hadran damweiniau ac achosion brys. Mae Bwrdd Iechyd Hywel Dda wedi cynnig newidiadau sylweddol i'r ffordd y caiff gwasanaethau eu darparu mewn ysbytai yng ngorllewin Cymru. Maent yn cynnig israddio ysbyty cyffredinol Llwynhelyg yn ein sir ni ac ysbyty cyffredinol Glangwili yn sir Gâr, y ddau i safon ysbytai cymuned, ac adeiladu ysbyty cyffredinol newydd yn ardal Hendy-gwyn ar Daf. Fodd bynnag, mae hyn hefyd yn golygu na fydd gennym bellach adran damweiniau ac achosion brys sy'n gweithredu'n llawn yn ein sir oherwydd y bydd yr adran hon wedi'i disodli gan uned mân anafiadau ar safle Llwynhelyg. O ganlyniad, bydd cleifion y mae angen gofal brys arnynt yn ein sir yn wynebu teithio am hyd at awr, neu efallai hyd yn oed yn fwy os ydynt yn byw yn ardaloedd mwy gwledig ein sir, i gael gofal brys a all achub bywyd mewn ysbyty a fydd y tu allan i'r sir. Byddai'r oedi hwn yn golygu bod bywydau yn sir Benfro mewn perygl, heb ystyried yr oedi ychwanegol wrth orfod aros am ambiwlans i gyrraedd y claf, sefydlogi'r claf, wedyn cludo'r claf i ysbyty sydd y tu hwnt i ffiniau ein sir. Mae hyn yn golygu colli munudau hanfodol mewn sefyllfa lle nad oes amser i'w golli.

 

Y cefndir

Lansiodd Bwrdd Iechyd Hywel Dda ei ymgynghoriad cyhoeddus ffurfiol ar ei gynigion i newid y modd y darperir gwasanaethau iechyd ar draws y bwrdd iechyd ar 19 Ebrill 2018 'Trawsnewid ein Gwasanaeth Iechyd: Dogfen ymgynghori'. Bydd yr ymgynghoriad yn rhedeg am 12 wythnos tan 12 Gorffennaf 2018. Bydd y Bwrdd Iechyd yn penderfynu sut i fwrw ymlaen yn nes ymlaen yn 2018.

 

Mae tri chynnig i’r Ymgynghoriad, sy'n ceisio symud mwy o wasanaethau allan o ysbytai i gymunedau a darparu gofal yng nghartrefi’r cleifion lle mae hynny’n bosibl. Ym mhob un o'r tri chynnig:

§    Bydd Ysbyty Cyffredinol Dosbarth Bronglais yn parhau i ddarparu gwasanaethau ar gyfer canolbarth Cymru.

§    Bydd ysbyty newydd yn cael ei adeiladu ger ffin Sir Gaerfyrddin-Sir Benfro gan gynnwys uned Damweiniau ac Achosion Brys.

§    Bydd deg canolfan gymunedol, yn darparu amrywiaeth o wasanaethau iechyd a gofal gan gynnwys rhai triniaethau a oedd yn arfer â chael eu gwneud yn yr ysbyty.

O dan y tri chynnig, byddai ysbyty Llwynhelyg yn Hwlffordd yn cael ei israddio o ysbyty cyffredinol dosbarth. Y cynigion yw y bydd Ysbyty Cyffredinol Llwynhelyg yn dod yn un o rwydwaith o ysbytai cymunedol.

Bydd ysbytai cymunedol yn darparu gwelyau anfeddygol (i bobl sydd angen ychydig mwy o driniaeth nag y gallant ei gael gartref); triniaeth ar gyfer mân anafiadau; profion gan gynnwys sganiau a gwasanaethau dan arweiniad bydwraig.

Trafodaethau yn y Cyfarfod Llawn

Mae israddio posibl Ysbyty Llwynhelyg a'r ymgynghoriad cysylltiedig yn faterion a godwyd ar nifer o achlysuron yn ystod y misoedd diwethaf yn y Cyfarfod Llawn.  O ganlyniad i’r cynlluniau, nodwyd y bydd angen i fwy o gleifion yn Sir Benfro deithio ymhellach ar gyfer gwasanaethau iechyd a gallai hyn effeithio ar gymunedau ar draws y sir.

Yn fwyaf diweddar ym mis Mehefin 2018, mynegwyd pryderon bod pob opsiwn a gynigir fel rhan o'r ymgynghoriad yn arwain at israddio Ysbyty Llwynhelyg heb unrhyw opsiwn i ddiogelu'r gwasanaethau a gynigir.  Mewn ymateb i'r pryderon hyn, nododd Llywodraeth Cymru fod ymgynghoriad eang yn digwydd a bod yr opsiynau wedi'u datblygu gyda 'meddygon, nyrsys a staff, pobl sy'n darparu gofal, cynrychiolwyr grwpiau cleifion a'u partneriaid'.  Tynnwyd sylw hefyd at y ffaith ei bod yn hanfodol bod pobl yn mynegi barn ar strwythur y gwasanaethau yn y gorllewin yn y dyfodol.

Yn ystod Cyfarfod Llawnym mis Mai 2018, dywedodd Aelod Cynulliad eu bod wedi cael gwybod am ymwybyddiaeth isel o ymgynghoriad y Bwrdd Iechyd ac y gallai fod wedi'i wneud yn fwy hygyrch.  Gwelwyd bod yr angen i'r Bwrdd Iechyd ymgysylltu’n agored yn bwysig.  Ymatebodd Llywodraeth Cymru gan ddweud ei bod yn cydnabod yr angen i'r Bwrdd Iechyd gydnabod lle na chaiff pobl eu cyrraedd a byddai’n barod i drafod unrhyw welliannau y gellid eu gwneud i’r ffordd y mae'r Bwrdd Iechyd yn ymgysylltu â'r cyhoedd.

Mynegwyd problemau gyda meddygon y tu allan i oriau yn ardal Bwrdd Iechyd Hywel Dda gan Aelod Cynulliad ym mis Mai 2018 a nodwyd hefyd y gellid rhoi mwy o bwysau ar wasanaethau Damweiniau ac Achosion Brys o ganlyniad i hyn.  Gallai hyn fod yn broblem wedyn os ceir gwared ar adran Damweiniau ac Achosion Brys Ysbyty Llwynhelyg.  Cadarnhaodd Llywodraeth Cymru ei bod wedi llwyddo i ddenu meddygon i ardal Ceredigion a gogledd Sir Benfro a byddai'n disgwyl i Hywel Dda barhau i ddenu mwy o feddygon i sicrhau bod digon o feddygon ar gael y tu allan i oriau.

 

 

 

 

 

 

 

 

Gwneir pob ymdrech i sicrhau bod y wybodaeth yn y papur briffio hwn yn gywir adeg ei gyhoeddi. Dylai darllenwyr fod yn ymwybodol nad yw'r papurau briffio hyn yn cael eu diweddaru o reidrwydd na'u diwygio fel arall i adlewyrchu newidiadau dilynol.